OŠ “Olga Golović” već dugo bez biste

Naime, čitalac našeg portala poslao nam je fotografiju na kojoj se vidi da bista nedostaje, a prema njegovim riječima nje na tom mjestu nema već više od godinu dana, a možda i duže.

Kako nam je kazala direktorica ove ustanove Olja Vukotić, bista je ukradena još i prije nego što je ona došla na tu funkciju, ali iočekuje da će u dogledno vrijeme biti ponovo postavljena.

“Bista koja je krasila dvorište naše škole, a koje tu nema već duže vrijeme, nažalost je ukradena i to još i prije nego što sam ja došla na mjesto direktora ove ustanove, u januaru 2019. godine. S obzirom da njena ponovna izrada i postavljanje iziskuje dosta sredstava, mi ćemo nastojati da u dogledno vrijeme riješimo taj problem i vratimo bistu gdje joj je i mjesto. Takođe se nadam da ubuduće biste narodnih heroja, koji su zadužili sve nas, neće biti više meta neodgovornih pojedinaca “, kazala nam je Vukotić.

Valja podsjetiti da biste naših narodnih heroja ne služe da bi ih skrnavili i otuđivali, već da bi na taj način izrazili poštovanje prema žrtvi koju su podnosili za opšte dobro, pa vjerujemo da će u dvorištu jedne od najstarijih škola u gradu uskoro biti postavljena nova, a koja neće završiti kao prethodna.